ಚಿತ್ರ ಕೃಪೆ: Gopi Hirebettu

ಭರಿಸಲಾಗದು ಮನೆಯಲಿ ನಿನ್ನಯ ಅನುಪಸ್ಥಿತಿ
ಹೇಗೆ ತಿಳಿಸಲಿ ಮನಸಿನ ನನ್ನ ಕಲಕುವ ಈ ಸ್ಥಿತಿ

ಅಪ್ಪ ನಿನ್ನನು ನೋಡಿದ ಒಂದೂ ನೆನಪು ನನಗಿಲ್ಲ
ನಿನ್ನ ಕತೆಯನು ಕೇಳುತಾ ಬೆಳೆದೆ ನಾನು ದಿನವೆಲ್ಲ
ಪುಟ್ಟ ಕಣ್ಣಲಿ ಎಂದಿಗೂ ಅಮ್ಮ ತೋರಿದ ಬೆರಗು ನೀ
ಕವಿದ ಮನದ ಇರುಳನು ಕಳೆಯೊ ಬೆಳಕ ಸೂರ್ಯ ನೀ
ನಿನ್ನ ನೆನಪೇ ನನ್ನ ಪೊರೆವ ಬೆಚ್ಚಗಿನ ಶ್ರೀರಕ್ಷೆಯು
ನೀನು ಕಂಡ ಕನಸೇ ನಾನು ನಡೆಯುವ ದಾರಿಯು

ಅಪ್ಪ ನಿನ್ನ ಕಾಣುವೆ ನಾ ಗಡಿಯ ಕಾಯುವ ಯೋಧರಲ್ಲಿ
ಶತ್ರು ಗುಂಡಿಗೆ ಹೆದರದೆ ಎದುರು ನಿಲ್ಲುವ ಛಾತಿಯಲ್ಲಿ
ದೇಶ ಕಾಯ್ದ ಸೈನಿಕ ಅನ್ನೋ ಹೆಮ್ಮೆ ನನಗಿದೆ
ಬಿಟ್ಟು ಹೋದ ಹೆಜ್ಜೆಯಲ್ಲಿ ಮುಂದೆ ಸಾಗುವ ಕನಸಿದೆ
ಆರದು ಎಂದೆಂದಿಗೂ ನೀನು ಹಚ್ವಿದ ದೀಪವು
ನಿನ್ನ ನೆನಪಲಿ ಮೊಳಗಿದೆ ರಾಷ್ಟ್ರಭಕ್ತಿಯ ಗೀತವು...

ರವೀಂದ್ರ ನಾಯಕ್ ಸಣ್ಣಕ್ಕಿಬೆಟ್ಟು