ಯಾರೊ ತೋರಿದ ದಾರಿಯಲ್ಲಿ
ನಡೆದು ಬಳಲಿದೆ ಸುಮ್ಮನೆ
ಗಮ್ಯ ತಿಳಿಯದ ಗುಟ್ಟಿನಲ್ಲಿ
ಮರೆತು ಹುಡುಕಿದೆ ನನ್ನನೆ

ಗುರಿಯ ತೋರುವ ದಾರಿಗಳಿಗೆ
ಬೀಸಿ ಕರೆಯುವ ಕವಲಿದೆ
ಗುರುವು ಕಾಣದೆ ನಿಂತ ನಿಲುವಿಗೆ
ಅತ್ತ ಹೊರಳುವ ತೆವಲಿದೆ

ಹಕ್ಕಿ ಹಾಡನು ಹೆಕ್ಕಿ ನೋಡು
ಗೂಡು ಮಗ್ಗುಲ ಹಾಸಿಗೆ
ಬಣ್ಣ ಬಣ್ಣದ ಹಕ್ಕಿ ಕಾಡು
ಕೂಡಿ ಗದ್ದಲ ಸಂತೆಯೆ

ಯಾವ ಹಕ್ಕಿಯ ಕೊರಳ ದನಿಯ
ಜಾಡು ಹಿಡಿಯಲಿ ಇಂದು ನಾ?
ದಾರಿ ಕಳೆದು ಹೋಗಿ ಸೇರಲು
ತಾನು ಮುಟ್ಟುವೆ ಎಂದು ನಾ?

ರವೀಂದ್ರ ನಾಯಕ್ ಸಣ್ಣಕ್ಕಿಬೆಟ್ಟು