ಕೋಳಿಗಳ ಕಾಲಿಗೆ ಕತ್ತಿ ಕಟ್ಟಿ
ಹುರಿದುಂಬಿಸುವವರೆಗೂ
ಒಬ್ಬರ ಮೇಲೊಬ್ಬರಿಗೆ,
ಅಷ್ಟು ರೋಷವಿರಬಹುದೆಂಬ
ಕಲ್ಪನೆಯೂ ಇರಲಿಲ್ಲ.

ಅಂಕಕ್ಕೆ ಇಳಿದ ನಂತರ
ಮತ್ತೆ ಯೋಚನೆಗಿಲ್ಲಿ ಅವಕಾಶಗಳಿಲ್ಲ.
ಇರುವುದಿಷ್ಟೇ;
ನಾನೋ ನೀನೋ ಎನ್ನುವ
ಅಂತಿಮ ವ್ಯಾಪಾರ.

ಬೆನ್ನ ಹಿಂದೆ ನಿಂತವರಿಗೆ
ಇದು ಈ ಕ್ಷಣದ ಪಂದ್ಯವಷ್ಟೇ;
ಅವರ ಚೀಲಗಳಲ್ಲಿ
ಮತ್ತೂ ಇವೆ,
ಕಾಲಿಗೆ ಕತ್ತಿ ಕಟ್ಟಿಸಿಕೊಳ್ಳಲು
ಕಣ್ಣಿಗೆ ಬಟ್ಟೆಕಟ್ಟಿಕೊಂಡ
ಬೇರೆ ಬೇರೆ ಬಣ್ಣದ ಕೋಳಿಗಳು.

ಅಲ್ಲಿಯವರೆಗೆ,
ಅವುಗಳೀಗ ಒಂದೇ ಚೀಲದಲ್ಲಿ
ಸುಖವಾಗಿ ಮಲಗಿವೆ,
ಒಂದನ್ನೊಂದು ಅಪ್ಪಿಕೊಂಡು;

ಕಾಲಿಗೆ ಕತ್ತಿ ಕಟ್ಟುವುದೂ ಒಂದೇ,
ಮತ್ತು
ಕಣ್ಣಿಗೆ ಬಟ್ಟೆ ಕಟ್ಟುವುದೂ.
ಒಟ್ಟಿಗಿದ್ದವರೆಂದು
ಆ ಕ್ಷಣಕ್ಕೆ ಗೊತ್ತಾಗುವುದೇ ಇಲ್ಲ;
ಮತ್ತು ಅಂಕಕ್ಕೆ ರಂಗೇರಲು
ಅಷ್ಟೇ ಸಾಕು,
ಈ ಜನಕ್ಕೆ;
ಆ ಕ್ಷಣಕ್ಕೆ...!

ರವೀಂದ್ರ ನಾಯಕ್ ಸಣ್ಣಕ್ಕಿಬೆಟ್ಟು