ಈ ಭೂತವೊಂದು ಮೈಯಲ್ಲಿ ಹೊಕ್ಕಿ
ಕುಣಿದು ಧೀಂ ತಕಿಟ ತಕಿಟ
ಎಷ್ಟು ಹೊದ್ದರೂ ಒಳ ಸುಳಿಗೆ ಸಿಕ್ಕಿ
ನಡುವೆಲ್ಲ ಕೊರೆವ ಕೀಟ

ಬೋಳಾದ ಮರಕು ಹಸಿ ಚಿಗುರ
ಬಯಕೆ ಅಹಾ! ನಿಮಿರಿ ಎಂಥ ಪುಳಕ
ಕಾದು ಕುದಿದ ನರನಾಡಿ ಉರಿಗೆ
ಸರಿ ರಾತ್ರಿ ನೀರ ಜಳಕ

ಮೋಡವೆಲ್ಲವೂ ಪೂರ್ಣಕುಂಭ
ಕಂಡಂತೆ ಜೋಡಿ ತೊನೆದಾಟ
ಮಾವು ತೂಗೊ ಗಿಡ ಭಾರವಂತೆ
ಅಲ್ಲಿ ಕಚ್ಚೊ ಗಿಳಿಯ ಕಾಟ

ಶಾಂತ ದೀಪದ ಒಡಲು ಚಂಚಲ
ಬೀಸಿ ಮಾಗಿ ಚಳಿಗಾಳಿ
ಒದ್ದೆಒದ್ದೆ ಹಸಿ ಕನಸ ನಿದ್ದೆಗೂ
ಕಾಮಪುಷ್ಪ ಶರ ಧಾಳಿ!

ರವೀಂದ್ರ ನಾಯಕ್ ಸಣ್ಣಕ್ಕಿಬೆಟ್ಟು