ಹಾಗೆಲ್ಲಾ ಒಪ್ಪಿಕೊಳ್ಳುವುದಾಗಿದ್ದರೆ -
ಬಿಡಿಬಿಡಿಯಾಗಿ ಅರಳಿದ್ದ ಹೂಗಳನ್ನೆಲ್ಲಾ
ದಾರದಲ್ಲಿ ಬಿಗಿದು
ಪೋಣಿಸುವ ಅಗತ್ಯವೇನಿತ್ತು ಹೇಳಿ?
ಬೆಳಕಿರುವವರೆಗಾದರೂ
ನಗುತ್ತಿದ್ದವು ಗಿಡದಲ್ಲಿಯೇ;
ಅಷ್ಟಕ್ಕೂ ಚಿವುಟಲೇ ಬೇಕೆನ್ನುವ
ಹಟವಾದರೂ ನನಗೇನಿತ್ತು ಹೇಳಿ?

ಅದೆಷ್ಟು ದಾಟಿಸಿದರೂ
ಕೆಲವೊಂದು
ನಿಮ್ಮಲ್ಲಿಯೇ ಉಳಿದು ಬಿಡುತ್ತವೆ,
ಬಿಕರಿಯಾಗದೇ ಉಳಿದ
ಸಂತೆಯ ಸರಕುಗಳಂತೆ.

ಹಾಗೆಲ್ಲಾ ಖಾಲಿಯಾಗುತ್ತಿದ್ದರೆ -
ಬಾಡಿಹೋಗುತ್ತಿದ್ದ ಹೂಗಳಿಗೆಲ್ಲಾ
ಮತ್ತೆ ಮತ್ತೆ ನೀರುಣಿಸಿ
ತಾಜಾ ಮಾಡುವ ಅಗತ್ಯವೇನಿತ್ತು ಹೇಳಿ?

ಇಲ್ಲಿ ಎಲ್ಲವೂ,
ಬಿಸಿಯಾಗಿರಬೇಕು
ಅಥವಾ
ಬಿಗಿಯಾಗಿರಬೇಕು.

ಅಷ್ಟಕ್ಕೂ,
ನಿಗಿನಿಗಿ ಹೊಳೆಯುವಷ್ಟು
ಕಾಯಿಸಲೇ ಬೇಕೆನ್ನುವ ತುರ್ತು
ನನಗಾದರೂ ಏನಿತ್ತು ಹೇಳಿ?

ರವೀಂದ್ರ ನಾಯಕ್ ಸಣ್ಣಕ್ಕಿಬೆಟ್ಟು