ಅಭಿವ್ಯಕ್ತ 

ಬಾನಎತ್ತರಕ್ಕೇರುವ ಮಾನವನ ಆಸೆ,

ಇರಬೇಕು ತನ್ನ ಇತಿಮಿತಿಗಳರಿವು;

ಬೇರುಗಳ ನೆಲದಲ್ಲಿಯೇ ಆಳಕ್ಕಿಳಿಸಿ 

ಮಣ್ಣಿನ ಸತ್ವ,ಸಂಸ್ಕೃತಿಯ ಹೀರಿ,

ಮಾಡಬೇಕು ಗಗನ ಚುಂಬಿಸುವ ಆಸೆ.

ರೆಕ್ಕೆ ಮೂಡಿದೊಡನೆಯೇ ಹಾರುವ 

ಪುಟ್ಟ ಹಕ್ಕಿಯ ಬಯಕೆ,

ಕನ್ನಡಿಯೊಳಗಿನ ತನ್ನ ಪ್ರತಿಬಿಂಬಕ್ಕೆ

ತಾನೇ ಮುತ್ತಿಕ್ಕಿದಂತೆ;

ಬಿಸಿಲುಗುದುರೆಯ ಬೆನ್ನ ಹತ್ತಿ 

ಮಾಯಾ ಜಿಂಕೆಯ ಬೇಟೆ?

ಕೈಗೆಟಕುವುದು ಅಂದುಕೊಳ್ಳುವಾಗ

ಮರೆಯಾಗುವುದು ನೆರಳು.

ಕಾಗದದ ದೋಣಿಯಲ್ಲಿ ದಡ ಸೇರುವ ತವಕ,

ಮುಳುಗುವ ಸೂರ್ಯನ ಹಿಡಿದಿಡುವ ಧಾವಂತ,

ಭಾವುಕ ಮನದ ನವಿರು  ಅಭಿವ್ಯಕ್ತಿ.