ಗಾಡಿ 

ನಿಂತಿದೆ ನನ್ನೊಂದಿಗೆ ನನ್ನ ಗಾಡಿ,

ಬೆಳಿಗ್ಗೆಯಿಂದ ಎಳೆದೆಳೆದು ಸುಸ್ತಾಗಿ 

ದಣಿದು ನಿಂತಿದ್ದೇನೆ,

ಒಂದಿಸ್ತ್ತು ವಿರಾಮಕ್ಕಾಗಿ.

ಬದುಕು ಜಟಕಾ ಬಂಡಿ,

ಓಡಿದರೆ ಓಟ, ಮಾತ್ರ ನನ್ನ ಆಟ;

ನನ್ನ ಗಾಡಿಗೇನು ಗೊತ್ತು?

ತೋರಿಸುವುದುಂಟು ಆಗಾಗ ನಖರ .

ಬಾರಕೊಲಿನ ರುಯ್ಯನೆ ಗಾಳಿ,

ಬಾಯಿ ತುಂಬಾ ನಿಲ್ಲದ ಬೈಗಳು 

ಅದಕ್ಯಾಕೋ ತುಂಬಾ ಇಷ್ಟ.

ನನ್ನ ಹೊಟ್ಟೆ ತುಂಬಿಸಲು ಓಡಿ ಓಡಿ,

ಸಡಿಲಗೊಂಡ ಚುರುಕು ಚಕ್ರಗಳು.

ಗಾಡಿ ನಿಂತರೆ ಬದುಕು ನಿಂತ ನೀರು.

ಸಾಗುತ್ತಿರಲಿ ಮುಂದೆ ಮುಂದೆ,

ಎಂದೆಂದೂ ನಿಲ್ಲದೆ: ಬದುಕು ನಡುಗದೆ.

ಇರುಳಿನಾಚೆಗೂ ಮತ್ತೆ ಹಗಲಿದೆ,

ವಿರಾಮದ ನಂತರ ಕೆಲಸವಿದೆ ಮುಂದೆ,

ಇಲ್ಲದೆ ಹೋದರೆ ನನ್ನದೇನಿದೆ ಇಲ್ಲಿ?

ಗಾಡಿ ಓಡುತ್ತಿದೆ;

ಜಗತ್ತು ಸಾಗುತ್ತಿದೆ.