ಮಗಳೇ
ಮರಳದಂಡೆಯ ಮೇಲೆ
ಹೇಗೆ ಕಟ್ಟಲಿ ಮನೆ?
ಇಟ್ಟಿಗೆ ಇಲ್ಲದ,
ಹೆಂಚು ಹಾಕಲಾಗದ ಮನೆ.
ನಿನ್ನ ಕಾಲನ್ನು ಒಳಗಿಟ್ಟು
ಮೇಲೆ ಮರಳ ರಾಶಿಯ ಸುರಿದು
ಕೈಯಿಂದ ಒತ್ತಿ ಮಾಡಿದ ಮನೆಯನ್ನೇ ಕೆಡವುತಿದ್ದಿ,
ಕೈತಟ್ಟಿ ನಗುತ್ತಿದ್ದಿ,
ಎಷ್ಟೊಂದು ಮುಗುದೆ ನೀನು?
ನಿನಗಿನ್ನೂ ಅರ್ಥವಾಗುತ್ತಿಲ್ಲ,
ಹೊರಗೆ ಬಂದು ಬಂದು
ಬಯಲು ಕಾಣುವ ಆತುರದಲ್ಲಿ
ಮನೆಯನ್ನು ಕೆಡವಿ ಪಿಳಿ ಪಳಿ ನೋಡುತ್ತಿದ್ದಿ.
ಹೇಗೆ ಕಟ್ಟಲಿ ಮನೆ?

ನೋಡು ಮೇಲೆ ಎಷ್ಟೊಂದು ಹದ್ದುಗಳು
ಹಾರುತ್ತಿವೆ,ಕುಕ್ಕಲು ನೋಡುತ್ತಿವೆ;
ಅವುಗಳ ಕಣ್ಣಿಂದ ನಿನ್ನ
ಬಚ್ಚಿಡಬೇಕು.
ಅಲೆಗಳು ದಂಡೆಯ ಮೇಲೆಯೇ
ನುಗ್ಗುತ್ತಿವೆ,
ನಿನ್ನ ಪಾದ ಸೋಕಬಾರದು.
ಜಗದ ಕಪ್ಪು ಕನ್ನಡಕದೊಳಗಿನ
ದೃಷ್ಟಿ ಹೇಗಿದೆಯೋ?
ಸೂರ್ಯನೂ ಇಣಿಕುತ್ತಾನೆ
ಮೋಡದ ಮರೆಯಿಂದ.
ಬೆಳಕನ್ನು ಕಂಡು ಸಂಭ್ರಮಿಸುವುದೋ,
ನೆರಳಿಗೆ ಹೆದರುವುದೋ,
ಅರಿವಾಗುತ್ತಿಲ್ಲ.

ಸ್ವಲ್ಪ ಸುಮ್ಮನಿರು
ಮನೆ ಕಟ್ಟುವವರೆಗೂ
ಬಾಗಿಲು ಹಾಕುವವರೆಗೂ.