ಮರೆವು ಬೇಕು 

ಮರೆವು ಬೇಕು ಮನಸಿಗೆ,

ಬದುಕಿನ ಸಂಕಷ್ಟಗಳ ನೆನಪು ಮತ್ತೆ ಮತ್ತೆ

ಬಾರದ ಹಾಗೆ;

ಸೋತು ಹೋದ ನಿರಾಸೆಯ ಕಾರ್ಮೋಡ 

ಮರಳಿ ಕವಿಯದ ಹಾಗೆ;

ಬಿಟ್ಟು ಹೋದ ಪ್ರೀತಿಯ ಭಾವ ತೀವ್ರತೆ 

ಇನ್ನು ಕಾಡದ ಹಾಗೆ;

ಮರೆವು ಬೇಕು ಮನಸಿಗೆ.

ಮನ ಕಲಕಿದ ಮನೆಯಾಕೆಯ ಬಿರು ನುಡಿಗಳು

ಕಣ್ಣ ಹನಿ ಗೂಡಿಸದ ಹಾಗೆ;

ಎತ್ತಿ ಆಡಿಸಿದ ಪ್ರೀತಿಯ ಮಕ್ಕಳ ನಿರ್ಲಕ್ಷದ

ನೋಟ ಚುಚ್ಚದ ಹಾಗೆ;

ಹೊಡೆದರೂ ಬಡಿದರೂ ಬಾಲ ಆಡಿಸಿ ಪ್ರೀತಿ ತೋರಿದ

ಸಾಕು ನಾಯಿಯ ಸಾವಿನ ಶುನ್ಯತೆ 

ಆವರಿಸದ ಹಾಗೆ;

ಅಂಗಳದಲ್ಲಿ ಬೆಳೆದ ಒಂಟಿ ಗುಲಾಬಿ ಗಿಡದ 

ಒಂದೇ ಹೂವನು ಯಾರೋ ಕಿತ್ತ 

ನೆನಪು ಬಾರದ ಹಾಗೆ;

ಮರೆವು ಬೇಕು ಮನಸಿಗೆ.

ಸಾಧನೆಯ  ಹಾದಿಯಲ್ಲಿ ತೆಗೆದುಕೊಂಡ 

ತಪ್ಪು ನಿರ್ಣಯಗಳು ಕುಟುಕದ ಹಾಗೆ;

ಅವಕಾಶ ನೂರಿದ್ದರೂ ಬಾಚಿಕೊಳ್ಳದ ನನ್ನ

ಉದಾಸೀನ ಕೆರಳಿಸದ ಹಾಗೆ;

ಎಲ್ಲಾ ಮರೆತು ಮತ್ತೆ ಬದುಕಿನ

ಹಳಿಗೆ ಮರಳುವ ಉತ್ಕಟ ಬಯಕೆಯ

ಕನಸು ಮಸುಕಾಗದ ಹಾಗೆ;

ಮರೆವು ಬೇಕು ಮನಸಿಗೆ.