ಮುಖವಾಡ
ನಾವು ಬದುಕುತ್ತೇವೆ ಬರಿಯ
ಮುಖವಾಡಗಳ ಒಳಗೆ.
ಖಾಸಗಿತನದ ನೂರು ದುಗುಡಗಳ
ಹಂಚಿಕೊಳ್ಳದೆ, ಬದುಕು ಬತ್ತಲಾಗುವುದ
ನೋಡಲಾಗದೆ ಒಳಗೆ ತೂರಿ ಕೊಳ್ಳುತ್ತೇವೆ.
ಕಪ್ಪು ಬಿಳುಪಿನ ವ್ಯಕ್ತಿತ್ವಕ್ಕೆ ರಂಗೆರಚಿ,
ಬೆಳೆಸಿಕೊಂಡ ಉನ್ನತ ವ್ಯಕ್ತಿತ್ವದ
ಬಣ್ಣ ಮಾಸುವುದ ನೋಡಲಾಗದೆ
ಬಚ್ಚಿಟ್ಟು ಕೊಳ್ಳುತ್ತೇವೆ.
ಸುಳ್ಳಿನ ಸರಮಾಲೆಯನೆ ಹೆಣೆದು,
ಹಾಕಿಕೊಂಡ ಮಾಲೆಯ ಮುತ್ತಿನ ಹಾರದ
ಸತ್ಯ ಬಯಲಾಗುವುದ ನೋಡಲಾಗದೆ
ಅಡಗಿ ಕೊಳ್ಳುತ್ತೇವೆ.
ನಾವು ಬದುಕುತ್ತೇವೆ ಬರಿಯ
ಮುಖವಾಡಗಳ ಒಳಗೆ;
ಕಳಚಿ ಬೀಳುವ ಭಯದ ನಡುವೆಯೂ
ಗೊತ್ತಾಗದ ಹಾಗೆ.
No comments:
Post a Comment