ಭಾವ ಸಮಾಧಿ

ಮನದ ಕ್ಯಾನ್ವಾಸ್ ಮೇಲೆ ಚೆಲ್ಲಿದ್ದ ರಂಗು 

ಬಗೆ ಬಗೆಯಾಗಿ ಹರಡಿ,

ಶುಭ್ರ ಬಿಳಿ ಬಣ್ಣಕ್ಕಿದ್ದ ಬಟ್ಟೆಯ ಮೇಲೆ

ನೂರು ಬಣ್ಣಗಳ ಚಿತ್ತಾರ;

ಚೌಕಟ್ಟಿಲ್ಲದೆ  ಗೊತ್ತು ಗುರಿಯಿಲ್ಲದೆ 

ಒಟ್ಟಾರೆ ಚೆಲ್ಲಿದ ರಂಗಿನ ಎರೆಚಾಟ.

ಭಾವನೆಗಳು ಬಣ್ಣಗಳೊಡನೆ ಮಿಳಿತವಾಗದೆ

ಅರಳಿದ ಕಾಗದದ ಹೂವು,

ಪರಿಮಳವಿಲ್ಲ,ಮಕರಂದವಿಲ್ಲ;

ಬರಿಯ ಬಣ್ಣ ,ಶುಷ್ಕ ಭಾವ.

ಬಣ್ಣ ಇನ್ನೂ ಇದೆ ಕ್ಯಾನ್ವಾಸ್ ಖಾಲಿ ಇದೆ,

ಮನದಲ್ಲಿ ಹೆಪ್ಪುಗಟ್ಟಿದ ಮೌನ.

ಭಾವನೆಗಳಿಗೆ ರಂಗು ಚೆಲ್ಲುವವರು ಯಾರು?

ಮನದ ಮುಗಿಲಿನ ತುಂಬಾ ಒಂದೇ ಬಣ್ಣ,

ಕದಲುವ ಮೋಡವಿಲ್ಲ,ಹಾರುವ ಹಕ್ಕಿ ಇಲ್ಲ;

ಬೀಸುವ ಗಾಳಿಗೂ ಉದಾಸೀನತೆ ಯಾಕೋ? 

ಬಣ್ಣ ಮಾಸಿದ ಹಾಗೆ ಇಲ್ಲಿ

ಎಲ್ಲವೂ ಭಾವ ಸಮಾಧಿ.