ದೃಷ್ಟಿ 

ಕತ್ತು ಉದ್ದ ಮಾಡಿ ನೋಡುತಿದ್ದೇನೆ

ಆದರೂ ಎಲ್ಲವನ್ನು ನೋಡಲಾಗುತ್ತಿಲ್ಲ.

ಹಳೇ ಗೋರಿಯ ಮೇಲೆ ಅರಳಿ ನಿಂತ 

ಚೆಂಗುಲಾಬಿ,ಸಾಯುತ್ತಿರುವ ಬೇರು,

ಮರುಭೂಮಿಯಲ್ಲಿ ನಡೆದು ಸುಸ್ತಾದ

ಒಂಟೆಯ ಕಾಲಿನ ಗಾಯ,ಕೀವು ತುಂಬಿದ ಬಾವು;

ಸಾಗರದಾಳದಲ್ಲಿ ಅಸ್ತಿತ್ವಕ್ಕಾಗಿ 

ಓಡುತ್ತಿರುವ ಸಣ್ಣ ಮೀನುಗಳು,

ಕೆಲವು ಕಣ್ಣಿಗೆ ಕಾಣುತ್ತಿವೆ

ಮನಸ್ಸಿಗೆ ಗೋಚರಿಸುತ್ತಿಲ್ಲ.

ಮತ್ತೆ ಕೆಲವು ಕಣ್ಣಿಗೆ ಕಾಣುವಸ್ಟು

ಹತ್ತಿರದಲ್ಲೇ ಘಟಿಸುತ್ತಿವೆ.

ಅತ್ತ ಕಡೆ ಲಕ್ಷ ಕೊಡುವ ಅಗತ್ಯಕ್ಕೆ

ಯಾವ ಕಾರಣಗಳೂ ಸ್ಪಸ್ಟವಾಗುತ್ತಿಲ್ಲ.

ವಿಷಯಗಳಿಗೆ ವಾಚ್ಯವಾಗುವ;

ಸೂಕ್ಷ್ಮಗಳಿಗೆ ಸೂಚ್ಯಾವಾಗುವ,

ಕಲೆ ಎಲ್ಲರಿಗೂ ಕರಗತವಾಗುವುದಿಲ್ಲ.

ಅಭ್ಯಾಸವಾದವರು ಯಾವುದಕ್ಕೂ ಸ್ಪಂದಿಸುವುದಿಲ್ಲ,

ಅವರದ್ದು ಬೇರೆಯೇ ಲೋಕ.

ನೋಡಿದವರು ತೆರೆದುಕೊಳ್ಳುತ್ತಾರೆ,

ಕಣ್ಣು ಮುಚ್ಚಿದವರು ಮರೆಯುತ್ತಾರೆ.

ಇದು ಹೀಗೆಯೇ,ಅದು ಹಾಗೆಯೇ;

ಅಂತೇನೂ ಇಲ್ಲ.

ನೋಡುವ ದೃಷ್ಟಿಯಲ್ಲೇ ಲೋಕ.