ಕೊನೆಯ ಭೇಟಿ

 ಕೊನೆಯ ಭೇಟಿ

ದೀರ್ಘವಾದ ನನ್ನ ಬದುಕಿನ
ಅತೀ ಸಣ್ಣ ಭೇಟಿಯಾಗಿತ್ತದು.
ಓ ದೇವರೇ!
ಇಷ್ಟು ಕಾಡುವಷ್ಟು ಗಾಢವಿತ್ತೆ?

ಏನೋ ಅವಸರವಿತ್ತು
ಎಲ್ಲವನ್ನೂ ಕ್ಷಣದಲ್ಲಿ
ಕಬಳಿಸಿಬಿಡುವ ಆತುರವಿತ್ತು
ಬಹುಶಃ ಕೊನೆಯ ಭೇಟಿಯೆಂದು
ಆವತ್ತೇ ಅನಿಸಿತ್ತು!

ಹತ್ತಿರವಿದ್ದಾಗ ಮಾತಿಗೆ ಬರ;
ಮೌನ ಸದಾ ವಾಚಾಳಿ!

ಕಡಲನ್ನೇ ಕುಡಿದೆವು.
ಆದರೂ ಎಷ್ಟೊಂದು ದಾಹ?
ನಿಂತಿತೇ ಕಾಲ?
ಬೆಳಕಿಗೆ ತೆರೆಯದೇ
ಸಂಜೆಗೆ ನಿಲ್ಲದೇ
ಹೊರಟ ಬೇಸರ ಇನ್ನೂ ಹಸಿಯಾಗಿದೆ.

ಅದು ಹೇಗೋ,
ನಿನ್ನಿಂದ ಬಯಸಿದ್ದೆಲ್ಲವೂ
ಸಿಕ್ಕಿಬಿಟ್ಟಿದೆ ಈ ಬದುಕಲ್ಲಿ.
ಆದರೆ ಅದೆಲ್ಲವನ್ನೂ ಮರೆಸಿ ,
ಮತ್ತೆ ಮತ್ತೆ ನೆನಪಾಗುವಷ್ಟು
ಉಳಿದು ಹೋದದ್ದಾದರೂ ಏನಿತ್ತು ನಿನ್ನಲ್ಲಿ?

ದಾರಿಯನ್ನೇ ಸುಖಿಸಿದ ನಾವು
ಗುರಿಯತ್ತ ಮನಸ್ಸು ಮಾಡಲೇ ಇಲ್ಲ
ಬದುಕು ಜೊತೆಗೇ ಸಾಗಿತು
ದಾರಿಗಳು ಮಾತ್ರ ಸಂಧಿಸಲೇ ಇಲ್ಲ!

ಇದೀಗ,
ಕೊನೆಯ ಕೋರಿಕೆಯೊಂದು
ಬಾಕಿ ಉಳಿದಿದೆ ನೋಡು;
ಒಮ್ಮೆ ಭೇಟಿಯಾಗು.
ನಿನ್ನಲ್ಲೇ ಕಳೆದುಹೋದ
ನನ್ನ ಬೆಳಕಿನ ಕಿರಣವನ್ನು
ಈಗಲಾದರೂ ಒಪ್ಪಿಸಿಬಿಡು;
ಇಲ್ಲವಾದರೆ ಈ ಕತ್ತಲಿಗೆ
ನೀನೂ ಬಂದುಬಿಡು.

~ ರವೀಂದ್ರ ನಾಯಕ್ ಸಣ್ಣಕ್ಕಿಬೆಟ್ಟು